Gjykata e Arbitrazhit Sportiv ka marrë vendimin duke hedhur poshtë ankimimet e paraqitura nga Federata Ruse kundër UEFA-s dhe FIFA-s, si dhe ato të paraqitura nga katër klube ruse kundër vetë UEFA-s. Zenit St. Petersburg, Sochi, Cska Moskë e Dinamo Moskë i kishin kërkuar Uefa-s të mund të merrnin pjesë në kompeticionet ndërkombëtare, duke tentuar të ndërprisnin përjashtimin e klubeve ruse nga turnetë.
CAS e motivoi vendimin në këtë mënyrë: "Kolegji e konsideron për të ardhur keq që operacionet aktuale ushtarake në Ukrainë, për të cilat klubet, skuadrat e futbollit dhe lojtarët rusë nuk kanë asnjë përgjegjësi, kanë, për shkak të vendimeve të FIFA-s dhe UEFA-s, një efekt të tillë negativ ndaj tyre dhe mbi futbollin rus. Por këto efekte u kompensuan nga nevoja për një zhvillim të sigurt dhe të rregullt të ngjarjeve të futbollit për pjesën tjetër të botës."
Gjykata e Arbitrazhit të Sportit ka evidentuar se si konflikti midis Rusisë dhe Ukrainës ka krijuar rrethana të paparashikuara dhe të paprecedentë, të cilave FIFA dhe UEFA ka qenë e detyruar të përgjigjen. Vendimi i lë kampionët rusë të Zenit jashtë fazës së grupeve të Champions League. Edhe Sochi, i dyti sezonin e kaluar, do të përjashtohet gjithashtu nga shorti për raundin e tretë kualifikues të Champions League, të planifikuar për të hënën.
CAS ka refuzuar edhe ankimimin e Federatës për kombëtaren, e cila do të mbetet jashtë garës. Kolegji i gjykatës do të thirret të vendosë për çështje të tjera që përfshijnë atletë rusë dhe ekipe në sporte të tjera.
