Merkato nuk i dhuroi alternativat që do të dëshironte, por Shpëtim Duro nuk është nga ata që dekurajohen, përkundrazi është tepër optimist në vigjilje të sfidës së 7 korrikut kundër Iskras, për raundin e parë të Conference League. Faza përgatitore në Pogradec dhe seancat taktike në Elbasan, ku skuadra nga dje është e grumbulluar deri në ditën e ndeshjes, i kanë bërë të qartë Duros formacionin titular për të sfiduar malazezët, ku dilemat janë fare të pakta. Për portën Mario Dajsinani nuk ka rivalë, ndërsa blerja e re Cuci do të luajë në të djathtë të mbrojtjes, duke i lënë krahun e kundërt Velkoskit dhe qendrën dyshes Roganovic-Malota. Problem nëse mund të quhet kështu është se alternative e vetme e përfshirë në listën e ndeshjes është vetëm Turkaj.
Në anën tjetër, Laci ka përfshirë në skuadër për ndeshjen me Iskran edhe nigerianin Babatunde, por numri 10 i ri i kurbinasve vështirë se do të zbresë në fushë nga fillimi, me Duron që mund ti japë vetëm pak minuta në varësi të rezultatit, për të mos rrezikuar një dëmtim të mesfushorit, që është edhe blerja më e fortë e verës e bardhezinjve, që mund të kompromentojë sezonin e lojtarit. Kështu, Ujka përpara mbrojtjes me Spahiun e Zikon, do të mjaftojë për të suportuar tredhëmbëshin ofensiv me Mazrekajn e Guindon të sigurtë dhe një mes Zarubicës e Akiniemit që do të luajnë për një fanellë titullari. Malazezi vjen nga një dëmtim shumë gjatë, por ka rikuperuar dhe sensi i golit mund ta bëjë favorit në zgjedhjen e Duros.
Laci do të mundohet të shfrytëzojë në maksimum ndeshjen e parë në Elbasan, sonte në orën 20.00, për ta patur sa më të thjeshtë cështjen e kualifikimin në kthim kundër Iskras.
