Ana Maria Markoviç është kundër etiketimit të lojtares seksi. Ana është 22 vjeçe dhe luan për Grasshopper dhe kombëtaren kroate, por shtypi shpesh e ka cilësuar atë si ‘futbollistja seksi’. Një pseudonim që kroatja nuk e pëlqen fare. 22-vjeçarja do të donte që njerëzit të flisnin për të si futbolliste dhe njeri në vend që të flisnin për pamjen e saj fizike. Etiketim ky, ndër të tjera, që i ka shkaktuar jo pak probleme.
Sulmuesja, që është rritur në Zvicër, luajti ndeshjen e saj të parë për Kroacinë vitin e kaluar. Që atëherë, mediat janë fokusuar tek ajo. Markoviç pranoi se kjo vëmendje ka sjellë me vete gjëra pozitive, por nuk mungojnë as aspektet negative.
Dhe, ndonëse i pëlqejnë disa komente për bukurinë e saj, ajo mendon se gazetarët në disa raste janë shtyrë përtej: “Nuk më shqetëson nëse thonë se jam e bukur, e vlerësoj komplimentin – tregon ajo për faqen zvicerane 20min.ch - Por më pas u shfaqën artikuj gazetash në të cilat më cilësuan si futbollistja më seksi. Nuk më pëlqen kjo, do të thotë të shkosh përtej në gjykime dhe nuk është mirë as për mua, as për familjen time”.
Edhe ky etiketim i ka shkaktuar asaj probleme: “Pas kësaj më shkruanin shumë njerëz duke u shtirur si trajnerë, menaxherë, por unë e di saktësisht se çfarë duan nga unë. Ata nuk më kanë parë kurrë të luaj futboll dhe shohin vetëm pamjen e jashtme. Më duket një mëkat i madhe. Mendoj se këta njerëz duhet të dinë më shumë paraprakisht dhe të shohin se çfarë mund të bëj unë përsa i përket futbollit”.
Herë pas here gjërat marrin një kthesë më të keqe. Në fakt, Markoviç tregon se ka marrë imazhe eksplicite të pakërkuara në rrjetet sociale: “Ka disa foto të tilla, është vërtetë shumë e shëmtuar. Nuk e di pse një person e bën një gjë të tillë. Ndonjëherë, nga ana tjetër, mesazhe qesharake vijnë nga njerëz që shkruajnë se duan të më shërbejnë dhe, për shembull, duan të më pastrojnë këpucët e futbollit pas stërvitjes”.
Sulmuesja më vonë zbuloi se adhuron Luka Modric, por lojtari i saj i preferuar është dhe mbetet Cristiano Ronaldo. Ana e admiron disiplinën e tij: “Modric është padyshim një model i shkëlqyer për mua. Ai është një futbollist botëror dhe përfaqëson Kroacinë. Ka shumë lojtarë të mirë edhe te femrat, si Ramona Bachmann, por lojtari im i preferuar është Cristiano Ronaldo, sepse ai është shumë i disiplinuar. Mendoj se është shumë e rëndësishme të japësh maksimumin në sport dhe të kesh një mentalitet të mirë si ai”.
