Fundjavë tragjike në El Salvador ku humbi jetën një arbitër si pasojë e rrahjes së pësuar nga një grup lojtarësh dhe tifozësh. José Arnoldo Amaya, 63 vjeçar, ishte duke arbitruar një ndeshje amatore në stadiumin Toluca në San Salvador. Situata degjeneroi kur Amaya paralajmëroi dhe më pas përjashtoi një lojtar, i cili filloi ta godiste edhe kur arbitri ra në tokë. Për të rrahur arbitrin u bashkuan edhe lojtarë të tjerë, madje edhe disa tifozë që pushtuan fushën, edhe pse dinamika e saktë dhe autorët e dhunës vrastare nuk janë identifikuar ende.
Arbitri më pas vdiq në spitalin e Zacamilit për shkak të hemoragjisë së rëndë të brendshme të shkaktuar nga rrahjet. Federata vendase e futbollit ka lëshuar një deklaratë ku dënon “agresionin e kryer nga lojtarët dhe pseudotifosët që pati një përfundim fatal”. Ndërkohë, presidenti i Federatës Hugo Carrillo tha në programin televiziv El Tiki Taka: "Ne kemi besim se autoritetet do të jenë në gjendje të gjejnë përgjegjësit për vdekjen e arbitrit".
