Paguan Sheiku Mansour. Pronari i Manchester City ka vendosur të bëjë një dhuratë për tifozët që do të udhëtojnë në Porto për të marrë pjesë në finalen e Ligës së Kampionëve kundër Chelsea, planifikuar për 29 maj: do të jetë ai që do të mbulojë kostot e fluturimit dhe transfertës në Portugali. "Mijëra mbështetës të City do të përfitojnë nga iniciativa e krijuar për të lehtësuar presionin ekonomik ndaj tifozëve që janë përballur - dhe po përballen akoma - me situata të komplikuara për shkak të ndikimit të pandemisë Covid-19," lexohet në shënimin e klubit.
"I vetëdijshëm se si pandemia ka prekur të gjithë tifozët e Manchester City dhe ka shkaktuar një rritje në kostot e udhëtimit, Sheikh Mansour është përpjekur të heqë pengesën financiare më të rëndësishme për tifozët që do të jenë prezentë në finale - vazhdon komunikata e klubit - Kostot e fryra të Covid, së bashku me testet e nevojshme por të shtrenjta PCR do ta kishin bërë udhëtimin drejt finales të papërballueshme për shumë prej atyre mbështetësve me fat që u shortuan për një biletë".
"Pep dhe ekipi kanë pasur një sezon të jashtëzakonshëm dhe arritja në finalen e Ligës së Kampionëve pas një viti shumë të ngarkuar përfaqëson një moment me të vërtetë historik për klubin - shkruhet në deklaratën e Cityt - Prandaj është tepër e rëndësishme që numri më i madh i mundshëm i tifozëve të ketë mundësinë për të ndjekur këtë ndeshje të veçantë. Sidomos ata që e kanë mbështetur Manchester City në kohë të mira dhe të këqija për kaq shumë vite".
