Olsi Rama, drejtori i përgjithshëm i Partizanit, ka shkuar me dorë të rëndë pas triumfit kundër Teutës, duke akuzuar arbitritmin e Blerim Zirit, si tendencioz, edhe pse drejtuesi i të kuqve është munduar ta bëjë pa emra, për të shmangur dënimin e Disiplinës.
"Fituam mbi gjithçka e ndaj gjithçkaje - tha Rama - U treguam më të fortë se cdo situatë. Nuk po flas më shumë se pastaj do thonë... Pashë diçka që nuk është normale në dhomat e zhveshjes, ku sytë e lojtarëve sikur më thoshin: ‘Ne po bëjmë punën tonë dhe ju nuk po na mbroni nga gjyqtarët që po na dëmtojnë’.
Në lidhje me ndeshjen e ardhshme, po direkt për titull, me Vllazninë, Rama sqaroi: "Do të punojmë për të gjitha skenarët dhe do të luajmë në “Air Albania” ku fusha është shumë e mirë. Shpresojmë që edhe Vllaznia të jetë në nivel të lartë e ne shpresojmë që siç fituam me Teutën të fitojmë edhe këtë ndeshje".
