Një tjetër ngjarje e rëndë ka tronditur pasditen e djeshme, ku dy të rinj kishin dalë për gjueti në malet e Maqellarës, por vetëm njëri kthehet prej andej i gjallë. Sipas informacioneve të Policisë, një 27-vjeçar humbi jetën pasi është plagosur me armë gjahu, çifte, nga shoku i tij teksa kishin dalë për gjueti.
Ngjarja e rëndë ka ndodhur rreth orës 14:45, në vendin e quajtur “Malet e Obokut”, në Maqellarë. “Rreth orës 14:45, në vendin e quajtur ‘Malet e Obokut’, në Maqellarë, Rifat Xheleshi dhe Gentian Kosiqi kanë dalë për gjueti mbi fshatin e lindjes. Xheleshi, 18 vjeç, dyshohet se nga pakujdesia ka plagosur me armë gjahu çifte shokun e tij, Gentian Kosiqi, rreth 27 vjeç, banues në Maqellarë.
Si pasojë e plagëve të marra 27-vjeçari ka humbur jetën në spital. Ne po hetojmë rreth ngjarjes së rëndë, pasi në vendin e ngjarjes nuk ka pasur të tjerë persona dhe deklarimet e Xheleshit duhen marrë me rezerva. Ka qenë mesditë dhe fushëpamja e autorit të krimit ka qenë e plotë. Do të hetojmë që ngjarja të zbardhet plotësisht”, njoftoi Policia.
Vetëm pak minuta pas plagosjes 18- vjeçari Rifat Xheleshi u ka telefonuar banorëve të fshatit dhe ka kërkuar ndihmën e tyre për transportimin e të plagosurit, Gentian Kosiqi, drejt Spitalit në Peshkopi. Për shkak të terrenit të vështirë dhe largësisë nga rruga nacionale, ndihma është dhënë me vonesë.
Pas afro një ore nga momenti i plagosjes, Kosiqi është dërguar në urgjencën e Spitalit Rajonal të Peshkopisë, por për shkak të humbjes së një sasie të madhe gjaku, 27-vjeçari ka ndërruar jetë. Pas ngjarjes, Policia ka arrestuar në kushtet e flagrancës autorin e krimit Rifat Xheleshi.
DËSHMIA E AUTORIT
I pyetur nga oficerët e Policisë Gjyqësore Dibër autori është shfajësuar se në momentin që ka shtënë me çifte nuk e ka parë bashkëfshatarin Kosiqi, pasi kishte mjegull të dendur.
“Nga ora 11:30 u nisëm nga Maqellara drejt fshatit Obok. Dola ashtu si herë të tjera me Gentianin. Në mal u ngjitëm për të vrarë ndonjë kafshë a shpend të egër. Ishim disa metra larg njëri-tjetrit. Dallova se në një shkurre përballë meje po lëvizte diçka. Mbusha armën dhe qëllova. Në fakt mjegulla nuk më lejonte të dalloja çfarë e lëvizte shkurren disa metra larg meje. Brenda pak sekondash dëgjova thirrjen e Gentianit: ‘Mos, mos, se më vrave’.
Hodha armën dhe mbërrita shpejt pranë shokut. Gati më ra të fikët kur pashë Gentin të plagosur. Njoftova shumë shpejt njerëzit e mi të afërt që të vinin në mal, por për shkak të rrugës shumë të pjerrët dhe largësisë ndihma Gentianit iu dha me shumë vonesë. Ai rënkonte pa pushim dhe ne ishim të pamundur ta shpëtonim”, është shprehur për Policinë Rifat Xheleshi, 18 vjeç, banor i fshati Obok, Maqellarë. Mirëpo pohimet e Xheleshit janë marrë me rezerva nga ana e hetuesve të ngjarjes. A.L
