Sven-Goran Eriksson ndërroi jetë në gusht të vitit 2024, në moshën 76-vjeçare, për shkak të një tumori në pankreas. Kanë kaluar më shumë se dy vite. Llogaritë e tij, megjithatë, vijojnë të jenë të hapura. Autoriteti Tatimor britanik kërkon 3.5 milionë paund (më shumë se 4 milionë euro) detyrime tatimore, përveç interesave. Situatën për mediat britanike e ka shpjeguar Anders Runebjer, mik i familjes së ish-trajnerit dhe avokati i ngarkuar për t'u marrë me procedurat e trashëgimisë.
Avokati shprehet se situata është shumë e thjeshtë: aktualisht nuk ka para të gatshme për të shlyer detyrimin. Sipas tij, rreth një milion paund ndodhen në një llogari në Ishujt Kajman, ndërsa 300 mijë të tjera janë depozituar në një bankë britanike. Problemi qëndron te fakti se, për momentin, nuk është e mundur të vihet dorë mbi këto para. “I kam thënë autoritetit tatimor se nuk jam në gjendje t'i tërheq paratë nga Ishujt Kajman apo nga banka e tij në Mbretërinë e Bashkuar dhe u kam thënë se janë të lirë t'i sekuestrojnë. Më janë përgjigjur se nuk mund ta bëjnë këtë, ndaj u thashë se nuk kishte asgjë tjetër për të bërë dhe se, për rrjedhojë, nuk do të paguhen”, ka deklaruar avokati për “The Sun”.
Situata ka mbërritur në një pikë bllokimi. Nga njëra anë është Autoriteti Tatimor, i cili, përballë një shume kaq të madhe, nuk ka ndërmend të tërhiqet dhe po shqyrton mënyrat për ta rikuperuar atë. Nga ana tjetër janë familjarët më të afërt të ish-trajnerit, të cilët, pa dëshirën e tyre, ndodhen në një situatë shumë të vështirë. Bëhet fjalë për detyrime që nuk i kanë krijuar drejtpërdrejt ata dhe vetë avokati kundërshton pretendimin se Eriksson kishte tentuar t'u shmangej taksave. Atëherë, përse ekziston ende një dosje e hapur në emër të tij, e cila rëndon mbi familjarët? Problemi dyshohet se ka lindur nga kundërshtimet lidhur me trajtimin fiskal të disa operacioneve financiare, për të cilat autoritetet tatimore kanë vendosur të nisin hetime.
Eriksson ka qenë trajner i përfaqësueses së Anglisë nga viti 2001 deri në vitin 2006. Ai ka drejtuar gjithashtu Lazion, Manchester City dhe Leicester. Gjatë karrierës së tij, mendohet të ketë fituar rreth 25 milionë paund (afërsisht 30 milionë euro). Pak muaj pas vdekjes së tij, u zbuluan detyrime financiare që kalonin shifrën e 8 milionë paundëve, një shumë pothuajse dyfish më e madhe se bilanci pozitiv prej 4.8 milionësh. Me pak fjalë, ai kishte jetuar përtej mundësive të tij financiare.
Një surprizë e hidhur për fëmijët e tij, Johan dhe Lina, të cilët u përballën me një situatë pasurore që nuk përputhej aspak me imazhin që karriera e të atit kishte krijuar nga jashtë. Për të mos marrë përsipër rreziqe të mëtejshme, ata ndërmorën të vetmen zgjidhje që kishin në dispozicion: nisën të shisnin gjithçka që i kishte përkitur babait të tyre, me qëllim mbulimin e borxheve. Nga reliket sportive te sendet personale, gjithçka përfundoi në ankand. Të ardhurat nga shitjet u përthithën nga kreditorët. Kështu, ndërsa avokati po përpiqet të gjejë burime financiare, fëmijët duhet të përballen me një trashëgimi ku borxhet janë më të shumta se paratë.
