Ministri i Brendshëm Sandër Lleshaj mohon të ketë pasur tentativa për të manipuluar historinë e vrasjes së Klodian Rashës. Ai thotë se është ende e pasqaruar çështja e arsyeve pse polici qëlloi mbi të riun.
“Fatkeqësisht nuk ka qenë një situatë për të përdorur armën. Këtë e kam mësuar herët. Në reagimin e parë e kemi cilësuar tejkalim i përdorimit të armës për vetëmbrojtje. Arsyet e këtij krimi janë dhe sot të pakuptueshme. Duhet të thellohen hetimet dhe të kuptojmë motivet.
Është një ngjarje e rëndë dhe dinamika është sqaruar. Dinamika është sqaruar se nuk ka motiv. Prokuroria dhe SHÇBA duhet të sqarojnë, pse? Deklarata e parë e SHÇBA është në fuqi dhe sot. Pas akteve të para u pa që kishte tejkalim të ligjit. Para se të kryhej vrasja, polici ka kërkuar ndihmë. Janë të gjitha në dosje, por duhet parë” – tha Lleshaj në emisionin Real Story në News24.
Lleshaj dha dhe arsyet pse e dha dorëheqjen.
“Kam dhënë dorëheqjen. Nuk më larguan. Largimi nuk është shkak i një konteksti, por i një momenti të vetëm. Ishte një ngjarje e fortë te unë. Ishte një ngjarje e vetme, ishte një moment. Ishte dhimbja e një familjeje që drejtoi sytë nga shteti. E dyta ishte një reagim politik. Kanë të drejtë edhe qytetarët që reaguan. Janë një kategori që e kanë të detyruar të mos reagojnë që i përkasin politikës së vjetër” – tha Lleshaj. ©LAPSI.al
