Marc Bernal është një prej talenteve të shumta të akademisë së Barcelonës. Ai është vetëm 19 vjeç, ka fituar tashmë dy herë titullin e La Ligës dhe ka debutuar me përfaqësuesen e Spanjës. Aktualisht ndodhet me kombëtaren U-21, nga grumbullimi i së cilës ka dhënë një intervistë të hapur, ku ka folur edhe për prindërit e tij, duke zbuluar se tashmë i ka nxjerrë në pension. “Për një fëmijë është një ndjesi unike”, është shprehur mesfushori.
Rinovimi me Barcelonën dhe pensionimi i prindërve
Në intervistën e dhënë për emisionin “El Partidazo”, futbollisti i Barcelonës ka ndarë disa detaje nga jeta e tij personale. Ai tregoi se, pas nënshkrimit të kontratës së re me klubin katalanas, ka arritur t'u mundësojë prindërve të ndërpresin punën dhe të dalin në pension. Një vendim që vjen në një moment të veçantë të karrierës së tij, pasi Barcelona i besoi një kontratë të re edhe kur ai ishte ende në fazën e rikuperimit nga një dëmtim i rëndë në gju.
“Po të më duhej të përmendja diçka të rëndësishme që kam bërë, do të zgjidhja pa dyshim faktin që prindërit e mi kanë dalë në pension. Pak nga pak, kur panë se gjërat po shkonin mirë, filluan ta ulnin ritmin e punës. Për një fëmijë është një ndjesi unike”, deklaroi Bernal.
Në bisedën me Juanma Castañon, ai shtoi: “Ata nuk janë as të rinj dhe as të moshuar. Janë njerëz normalë dhe tani janë në pension”. Nëna e tij është 50 vjeçe dhe punonte në sektorin e informatikës, ndërsa babai, 57 vjeç, ishte punonjës banke. Një arritje që merr edhe më shumë vlerë po të mendosh se sa pak janë ata që në një moshë kaq të re mund t'u sigurojnë prindërve një ndryshim të tillë në jetën e tyre. Pas kësaj qëndrojnë vite pune, sakrificash dhe përkushtimi, përfshirë edhe për të mbështetur rritjen e një djali që gradualisht ka fituar vendin e tij në futbollin profesionist dhe te Barcelona.
Kush është Marc Bernal, talenti që kaloi një dëmtim të rëndë
Gjatë intervistës, mesfushori u ndal edhe te dëmtimi i rëndë në gju, i cili për një periudhë e bëri të dyshonte për të ardhmen e karrierës së tij. Fatmirësisht, rikthimi në fushë ka ardhur në mënyrën më të mirë të mundshme. Lëndimi i kushtoi pothuajse një vit të plotë jashtë futbollit, por në moshën 19-vjeçare Bernal numëron tashmë dy tituj të La Ligës dhe tre trofe në total me Barcelonën.
Ai ka regjistruar gjithashtu 50 ndeshje me fanellën e klubit katalanas, pavarësisht konkurrencës së jashtëzakonshme në skuadër, ndërsa ka debutuar edhe me kombëtaren e parë të Spanjës në miqësoren kundër Irakut. Kur rinovoi kontratën, Barcelona përfshiu në marrëveshje një klauzolë largimi prej 500 milionë eurosh. Ndërkohë, paga e tij kalon një milion euro, pa përfshirë bonuset.
