Një italian është burgosur përjetë për vrasjen e një të riu me origjinë shqiptare, i cili u gjet me dëmtime në kokë dhe gjoks në një banesë në Brighton.
Shqiptari Serxhio Marku, 21 vjeç, u gjet i plagosur në pronën në Stafford Road më 11 shtator 2019 dhe vdiq më vonë në spital.
Punëtori i kuzhinës Francesco D’Agostino, 45 vjeç, nga Stafford Road, u shpall fajtor në Brighton Crown Court të mërkurën, ndërsa sot u dha masa e dënimit me minimumi 22 vite burg, shkruan BBC. Pas dënimit të enjten, avokatja Alex Geldart tha se D’Agostino kreu “një sulm brutal”.
Ajo tha se familja dhe miqtë e Z. Marku kishin humbur një djalë dhe vëlla shumë të dashur, duke shtuar: “Gjatë gjithë hetimit tonë, familja e tij e ka mbajtur veten me dinjitetin më të madh, pavarësisht nga humbja e tyre tragjike”.
Policia tha se Z. Marku kishte pësuar dëmtime të mëdha nga goditjet me forcë dhe plagë nga prerjet me thikë.
Një patolog tha se kishte 13 plagë me thikë dhe midis 25-50 goditjeve të gjetura në trupin e Markut pas vdekjes, dhe dëmtimet mbrojtëse në duart e tij treguan se ai ishte përpjekur t’i rezistonte sulmit.
Fqinjët e dëgjuan atë duke e pyetur vazhdimisht: “Pse po ma bën këtë mua?” ndërsa sulmi po zhvillohej brenda banesës. Në një moment, Z. Marku u përpoq të largohej nga banesa, por u tërhoq përsëri brenda.
