Kryeministri Edi Rama ka dhënë detaje për paketën e zgjeruar ekonomike të prezantuar një ditë më parë. Ai tha se bonusi 40 mijë lekë do t'i jepet drejtpërdrejt në llogari personit të punësuar dhe jo biznesit.
“Marrëdhëniet do të jenë direkt, dhe pas aplikimit në drejtorinë e Tatimeve, do të bëhen verifikimet dhe paratë do i kalojnë gjithsecilit prej punonjësve në bankë” – tha Rama që u tregua i prerë për pagesat e sigurimeve shoqërore.
"Ti do t'i paguash sigurimet shoqërore të të gjithë atyre që ke në punë", iu përgjigj Rama një personi që ka biznes.
Rama tha se qeveria ka menduar edhe shpërblimin për të gjithë ata punonjës që kanë punuar në të zezë, por kjo do të përfitohet vetëm nëse ata do të kenë kurajën të denoncojnë kompaninë ku kanë punuar në mënyrë informale.
"Brenda 24 orëve do kemi këtë ofertë për ata që punojnë në të zezë", - tha Rama.
