Gianluca Vialli ka fituar ndeshjen më të rëndësishme jashtë fushës, atë kundër kancerit. Ish-sulmuesi i Sampdoria e Juventus ka zbuluar se e ka përfunduar me sukses ciklin e kemioterapisë: "Jam mirë, në dhjetor mbarova kemioterapinë prej 17 muajsh. Ishte e vështirë, edhe për një të fortë si unë, si fizikisht ashtu dhe mentalisht. Testet nuk tregojnë asnjë shenjë nga sëmundja. Jam i lumtur".
"Jam mirë e i lumtur, në dhjetor përfundova kemioterapinë 17 mujore, një cikël prej 8 muajsh e tjetri prej 9. Ishte e vështirë - tregoi ish-sulmuesi i kombëtares italiane për La Repubblica -. Të rigjej shëndetin do të thotë të shihem në pasqyrë, të shoh të më rriten flokët, të mos më duhet të vizatoj vetullat. Ndihem me fat".
Vialli ka folur pastaj për momentin e vështirë për shkak të pandemisë së Covid-19 "Ndihem me fat, mendoj për ata që shkojnë në spital dhe vdesin vetëm. Është një moment i tmerrshëm. Do të jetë fantastike kur sporti të kthehet, emocionet e kujtimet do të na ndihmojnë të kthehemi plotësisht në jetët tona".
