Duhej të luhej futboll dhe futboll u luajt, pas një solidarizimi me situatën për tu vlerësuar. E në optikën sportive, Bylis nuk zhgënjen pritshmëritë dhe konfirmohet skuadra më problematike për Partizanin, që nga Ballshi del i mundur 2-1, duke rrezikuar tashmë distancën e sigurisë në krye të klasifikimit. Lerda tani duhet të jetë i shqetësuar jo vetëm për rezultatin, por edhe dominimin që pësoi nga mallkastriotët e Dovedan, që pas dy humbjeve u kthyen të fitojnë dhe të vënë në presion kreun.
Të kuqtë sikur e ndjejnë sindromën Bylis dhe në daljen e parë përpara të vendasve e shohin veten në disavantazh, në një devijim fatkeq të Belicës, por që i dha të gjitha kreditet konkluzionit të Ndrecës, që përfundoi pas shpinës së Hoxhës në minutën e 6. Partizanit i takonte të reagonte dhe e bëri, duke barazuar me Bardhin në minutën e 27. Sulmuesi i shpëtoi markimit, në goditjen e dënimit të Trashit, për të festuar golin e parë në këtë kampionat.
Duken situata të përmbysura me rifillimin e lojës, edhe pse Bardhi shpresoi për një karton me tjetër ngjyrë kur Janku e ndaloi të shkonte drejt portës. Vetëm një minuta nga pjesa e dytë dhe ishte hera e fundit që Partizani u pa i rrezikshëm në zonën e Bylis. Skuadra e Dovedan mori kontrollin e lojës, duke ushtruar një presion të fortë në zonën e të kuqve, pa i dhënë frymëmarrje mesfushës të dilte qetë përpara.
Në krosimin e Ntepe i thjeshtë devijimi në shtyllën e parë i Guindo, që vendosi fitoren, që e ngjit formacionin surprizë të kampionatit në kuotën e 23 pikëve, vetëm dy larg Partizanit të vendit të parë. Lerda duhet të rishohë zgjedhjet e tij, edhe pse pas golit provoi edhe më katër sulmues në fushë, pa mundur të shmangë humbjen. E sikur të mos mjaftonte rezultati, humbi edhe dy mesfushorë për derbin me Tiranën: Broja e Telushi, i pari për plotësimin e numrit të kartonëve të verdhë dhe i dyti i ndëshkuar me karton të kuq në fundin e ndeshjes.
