Humbjet financiare të Operatorti të Shpërndarjes së Energjisë Elektrike llogariten në rreth 30 milionë euro deri në muajin tetor.
Ky vit ishte mjaft kritik për OSHEE-në, pasi që në pranverë niveli i ujit në hidrocentralet e Drinit ishte në kuota të ulëta dhe prodhimi ishte minimal, ndërkohë qe vetë kompania kishte shpenzuar mbi 115 milionë për sigurimin e energjisë nga importi, duke e tejkaluar kështu që në maj buxhetin e parashikuar për këtë vit. Ndërhyrja e parë për t’i ardhur në ndihmë OSHEE-së, u bë nga enti rregullator i energjisë që rriti afatin e shlyerjes së kontratave të importit nga operatori i shpërndarjes, nga 90 në 180 ditë.
Kjo krizë e prodhimit të energjisë ndikon në mënyrë të drejtpërdrejtë në ekonominë shqiptare duke ngadalësuar rritjen, ndërkohë që është kërkuar rivlerësim i pozicionit financiar dhe rishikim i investimeve. Nëse në dy muajt e fundit të vitit do të shënohen reshje shiu të mjaftueshme, OSHEE-ja do ta kapërcente disi këtë krizë. Në të kundërt, ndërhyrja me mbështetje nga buxheti i shtetit do ishte pothuajse e pashmangshme. ©Lapsi.al
