Një asteroid do të kalojë pranë Tokës të shtunën, por nuk do të ketë ndonjë rrezik përplasjeje. Agjencia Hapësinore Evropiane (ESA) njoftoi sot se ai do të jetë i dukshëm me teleskopë të vegjël ose edhe me dylbi të mëdha.
“Kalimi i afërt i një objekti të kësaj madhësie pranë Tokës ndodh vetëm një herë në disa vjet, megjithëse këtë herë Hëna e ndritshme dhe e afërt mund ta pengojë vëzhgimin e tij në momentin kur asteroidi do të jetë më afër”, - tha në një deklaratë Juan Luis Cano i zyrës së mbrojtjes planetare të ESA-s.
Ky trup shkëmbor hapësinor, me madhësi afërsisht 750 - 1650 metra, sipas llogaritjeve të bazuara në vlerësimin e albedos së tij (sasia e dritës së diellit që reflekton), u zbulua në vitin 1997 dhe u emërua (152637) 1997 NC1.
Ai do të kalojë më afër Tokës të shtunën në orën 13:14 (ora e Shqipërisë), me një shpejtësi prej 8.9 kilometrash/sekondë. Më pas do të jetë në një distancë prej 2,559,461 kilometrash nga planeti ynë, ose 6.66 herë distancën Tokë-Hënë, gjë që e bën zero mundësinë e një përplasjeje.
Asteroidi do të jetë i dukshëm nga hemisfera veriore gjatë fazës së afrimit të tij, pothuajse kudo ndërsa kalon më afër, dhe vetëm nga hemisfera jugore ndërsa largohet nga Toka.
Në zonat e botës ku do të jetë natë, teorikisht do të jetë i dukshëm me teleskopë të vegjël dhe madje edhe me dylbi të mëdha. /LAPSI.al
