Një valë të nxehti ka prekur pjesën më të madhe të Evropës Perëndimore duke shkaktuar më shumë se 40 vdekje në Francë. Ekspertët thonë se shkak është bërë fenomeni i njohur si "Bllokimi i Omegës".
Ky fenomen natyror e ka marrë emrin nga forma e shkronjës greke Ω, ku një vëllim ajri i ngrohtë (anticiklon) mbetet i bllokuar midis dy sistemeve me presion të ulët, duke bërë që të ndërpritet rrjedhën e ajrit.
Në kushte normale, rrjedha e ajrit shtyn sistemet e motit në mënyrë të qëndrueshme nga perëndimi në lindje. Por gjatë fenomenit Omega, kjo rrjedhë ndërpritet dhe si rezultat, ajri i ngrohtë dhe i ndenjur bllokohet mbi një zonë.
“Bllokimet Omega” zakonisht zgjasin nga 3 deri në 10 ditë - por në disa raste ato vazhdojnë për javë të tëra.
Si rezultat i presionit të lartë, kushtet bëhen të nxehta dhe të thata. Presioni i lartë gjithashtu parandalon formimin e reve, duke çuar në qiell të kthjellët që lejon rritjen e temperaturave.
Këto kushte krijojnë një koktej ekstrem moti në Francë dhe Spanjë, ku temperaturat kanë tejkaluar 40 gradë Celsius.
A është faji ndryshimi i klimës?
Shkencëtarët nuk pajtohen se si ndryshimi i klimës ndikon në frekuencën e valëve të nxehtësisë. Megjithatë, komuniteti shkencor në përgjithësi beson se ndryshimi i klimës po rrit frekuencën dhe intensitetin e valëve të nxehtësisë.
Emetimet e gazrave serrë nga djegia e qymyrit, naftës dhe gazit natyror kanë rritur temperaturën e planetit me rreth 1.3 gradë Celsius krahasuar me kohërat para-industriale.
Kjo do të thotë që, duke filluar nga kjo bazë më e ngrohtë, valët e të nxehtit tani po shënojnë temperatura më të larta. Në Evropë, valët e të nxehtit janë 2-4 gradë më të ngrohta sesa do të kishin qenë pa ngrohjen e shkaktuar nga njeriu, thotë Claire Barnes, studiuese e klimës dhe motit ekstrem në Imperial College London.
Si rezultat, kur ndodhin fenomene të tilla si Barrierat Omega, nxehtësia mund të jetë dukshëm më intensive. ©LAPSI.al
