"Askush nuk më pyeti për Lokomotiv në fakt", ka thënë Cristiano Ronaldo, duke lënë pa fjalë gazetarët në fund të konferencës për shtyp, në vigjilje të ndeshjes së Champions League kundër rusëve. Portugezi i Juventus është pyetur për gjithcka, përvecse se asaj që ishte edhe qëllimi i konferencës dhe në fund, me një batutë të stilit CR7 shënoi në portën e mediave...
Për të tjerat, Ronaldo është përgjigjur, pa krijuar divergjenca, por duke u kujdesur të mos keqkuptohet: "Mosha është një numër e nuk do të thotë se je në fund. Unë mund ta tregoj me përfaqësimet e mia, për mënyrën si luaj, si ndihem në formë më i kthjellët e më i pjekur se më parë. Kjo them se bën diferencën. Dybala e Higuain janë fantastikë, ashtu si Cuadrado e Bernardeschi. Të gjithë janë të shkëlqyer e bëjnë më të mirën e tyre".
Në dekadën në të cilën i gjithë diskutimi është nëse Topin e Artë do ta fitojë Ronaldo apo Messi, portugezi, të paktën me fjalë, nuk duket shumë i shqetësuar për Topin e Artë: "Nuk është i rëndësishëm, të rëndësishëm janë trofetë kolektivë. Kemi bërë një sezon fantastik e kemi nisur mirë këtë. Ajo që ka rëndësi është të fitojmë ndeshjen nesër, nëse ia dalim jemi 50% të kualifikuar".
Në fund edhe një vlerësim për Sarri, lojën e teknikut dhe idenë për ta vendosur Ronaldon në pozitat për të shënuar edhe më shumë: "
Më pëlqen mënyra me të cilën kërkon që skuadra të luajë. Ka më tepër besim, krijojmë më shumë raste. Ajo që ka ndryshuar është mënyra si lëvizim. Ndoshta nuk bëjmë gola sa duam, por krijojmë" përfundoi Ronaldo.
