Një humbje që djeg, një humbje që është vështirë të gëlltitet, sidomos atëherë kur e ke ndjerë se ishe fare pranë fitores. Këto janë ndjesitë që duhet ti kenë kaluar nëpër mend Edy Rejas, kur është detyruar të dalë i mundur nga fusha e Stambollit. Italiani nuk e ka fshehur inatin për rezultatin, por as kënaqësinë për lojën e skuadrës: "Nuk jam i zhgënjyer për lojën. Kemi bërë një lojë perfekte, po të mos ishte për episodin e minutës së fundit. Kemi pasur disa shanse për të kaluar në avantazh, duhej ta mbyllnim ndeshjet me ato raste. Djemtë janë të zhgënjyer dhe të mërzitur, mund ti kishim dhuruar popullit shqiptar një fitore të madhe. Humbëm një rast të mirë për 3 pikët këtu, që të vazhdonim garën për në Europian. Nuk është e thënë që nuk bëhet gjë për në Europian, por është shumë e vështirë rruga".
Komplimentet për lojtarët e tij, nuk i zbehin gjykimin teknikut 74 vjecar. Rastet e humbura para portës i kanë kujtuar mungesën e një sulmuesi të rëndësishëm: "Skuadra pati atë që duhej, grintën e duhur. Kishte disa pasime të tepërta të gabuara, por normale, sepse Turqia bëri një presing të fortë. Kishte lojtarë shumë të mirë fizikisht. Duhet të jemi më të vëmendshëm dhe vendimtar para portës. Kemi mangësi para portës, sepse u pa qartë sa raste humbëm".
