Tre punëtorët që morën plagë të rënda nga shembja e skelës ditën e djeshme nga pallati 13 katësh në rrugën “Faik Konica” në kryeqytt, ndodhen jashtë rrezikut për jetën.
Njëri prej tyre, Genti Bardhi, ka folur për televizionin informativ “ABC News”, duke treguar disa detaje nga momentet e fundit të punës, para se të rrëzohej skela.
Bardhi është shprehur se as nuk e kujton se si ka ndodhur shembja dhe se është një mrekulli që ka mbiijetuar. Punonjësi i kompanisë së ndërtimit “Xhimi”, ka thënë se ndodhej në katin e katërt të ndërtesës në momentin që skela ka rënë, dhe për disa çaste ka qenë i varur nga bluza në skele dhe më pas ka rënë në tokë.
Ndërsa, kolegu i tij që fatkeqësisht ndërroi jetë, ishte në katin e 6-ë. Përsa i përket viktimës tjetër, Genti u shpreh se nuk mban mend asnjë detaj dhe se e ka marrë vesh nga njoftimi i Policisë që ka ndërruar jetë.
Sakaq, dy punonjësit e skelës që i kanë shpëtuar ngjarjes fatale, janë hedhur nga skela.
