Përfaqësues të OSBE-së në Shqipëri kanë zhvilluar në intervalin treditor 19-21 mars një mision vëzhgues për zgjedhjet lokale të 30 qershorit. Në konkluzionet e paraqitura në raportin e misionit të vlerësimit të situatës politike, të kornizës legjislative zgjedhore dhe të të gjitha hallkave të sistemit elektoral, vëzhguesit e OSBE-së kanë shprehur mosbesim ndaj vullnetit të palëve politike për të luftuar fenomenin e shit-blerjes së votave.
Lidhur me klimën e polarizuar politike, vendimi për djegien e mandateve nga opozita e bashkuar, veçohet në raport si një akt që ka stimuluar mbajtjen e protestave gati periodike dhe ka minuar mundësitë për dialogun ndërpartiak. Në këto rrethana, lokalet e 30 qershorit projektohen në një kontekst të pashembullt politik, cilësohet në brendi të raportit.
Ndër të tjera, në raport është evidentuar se një pjesë e konsiderueshme e kërkesave që i janë parashtruar qeverisë shqiptare për t’u përmbushur që prej viteve 2015-2017, mbeten ende të paplotësuara. Në funksion të një procesi zgjedhor transparent bazuar në legjislacionin vendas, ODIHR-i do të kërkojë nga shtetet pjesëmarrëse të OSBE-së, dërgimin e vëzhguesve afatgjatë për të ndjekur në përpikmëri ecurinë e zgjedhjeve të 30 qershorit.
