Partia Demokratike ka denoncuar Policinë e Shtetit për ushtrim dhune mbi banorët e zonës periferike të kryeqytetit, “Bregu i Lumit”, ku po kryhet procesi i shpronësimeve. Përmes një njoftimi për mediat, PD-ja ka shpërndarë edhe një foto ku mund të shquhet momenti i përplasjes së ish-deputetit Klevis Balliu me efektivët e Policisë.
Sipas PD-së, fotoja në fjalë përbën një provë të pakundërshtueshme të dhunës së ushtruar ndaj banorëve dhe ish-deputetëve që i janë bashkuar qendresës së tyre. Në deklaratën e selisë blu theksohet se Policia ka sekuestruar disa aparatë celularë, në sajë të të cilëve janë filmuar përleshjet.
Në orët e para të mëngjesit, në vendngjarje kanë mbërritur fadromat e Inpektoritatit Kombëtar të Mbrojtjes së Territorit (IMT), për prishjen e 7 objekteve prej 38 banesave në total, ku shtrihet “gjurma” e projektit të “Bulevardit të Ri”. Aksioni i sotëm pason shembjen e 7 banesave të tjera në javën e mëparshme, kur Policia përdori gaz lotsjellës për të shpërndarë banorët, të cilët kërkonin me ngulm dëmshpërblim financiar.
