Një banor i zonës, i cili tentoi të çante kordonin e policisë për të shkuar tek banesa e tij, ka shkaktuar tension te ‘Bregu i Lumit’ në Tiranë.
Dy ish-deputetët e opozitës, Klevis Balliu dhe Endrit Braimallari janë konfrontuar fizikisht me forcat e policisë në përpjekje për të ndihmuar qytetarin Agim Peposhi.
Ky i fundit pretendoi se nuk ka patur mundësi t’i largonte pajisjet e shtëpisë teksa u shoqërua në orët e para të kësaj të mërkure në komisariatin e policisë. Në pamjet e mëposhtme duket qartë momenti kur efektivi i policisë kap për fyti ish-deputetin e Partisë Demokratike, Klevis Balliun, ndërsa për asnjë çast nuk kanë munguar shtyrjet nga të dyja palët
Përpjekja e të riut, por edhe e dy ish-deputetëve të opozitës rezultoi e kotë pasi kordonin i policisë mbeti i pacënuar. Forcat e policisë ndryshe nga java e kaluar nuk kanë përdorur gaz lotsjellës kundrejt banorëve.
Gjurma e lotit të tretë për “Bulevardin e Ri” parashikon të prishë 38 shtëpi, ndërsa deri tani janë shembur dhjetë prej tyre.
