Një ditë pasi parlamentarët holandezë votuan pro rikthimit të regjimit të vizave për Shqipërinë, vjen reagimi i shefit të delegacionit të Bashkimit Evropian në Shqipëri, Luigi Soreca. Në një deklaratë për mediat, Soreca ka nënvizuar se aktualisht shqiptarët mund të vijojnë të lëvizin të lirë në hapësirën “Shengen”, por i ka bërë thirrje qeverisë shqiptare dhe asaj holandeze, të intensifikojnë bashkëpunimin për të luftuar migracionin e parregullt dhe rrjetet e krimit të organizuar. “Udhëtimi pa viza është një arritje fantastike për Shqipërinë dhe qytetarët që do të thotë se ka pasur një progres shumë të rëndësishëm dhe është për të gjithë qytetarët që prej vitit 2010. Ju e dini besoj që unë kam qenë në krye të këtij procesi që prej vitit 2010 dhe jam i bindur se autoritetet shqiptare do të marrin të gjitha masat që të ruhet kjo arritje fantastike që është bërë deri tashmë.”- është shprehur Soreca.
Në procesin e votimit të djeshëm në Parlamentin e Holandës morën pjesë të 150-të legjislatorët, mes të cilëve 105 shprehën vullnetin për pezullimin e liberalizimit të vizave, ndërsa 45 të mbeturit e refuzuan propozimin. Në total kanë qenë 9 parti politike (Partia Socialiste, PvdD, 50plus, VVD, SGP, CDA, CU, PVV, FVD) që dhanë 105 vota për të rikthyer vizat për shqiptarët.
Rikthimi i regjimit të vizave do ta kthente Shqipërinë shumë hapa pas në procesin e integrimit evropian, megjithatë, pavarësisht votimit të legjislativit holandez, propozimi mund të marrë karakter detyrues vetëm nga një vendim i Komisionit Evropian.
