Kryetari i Partisë Demokristiane Nard Ndoka, ka komentuar ditën e sotme qëndrimin e deputetes së PD-së Rudina Hajdarit, e cila nuk ka vendosur ende se çfarë do të bëjë me mandatin e saj si deputete.
Sipas Ndokës, znj.Hajdari u fut në PD për shkak se përfaqësonte të atin, ndërsa tani me qëndrimet që do të mbajë është koha të tregojë vlerat e saj.
“Unë kam njohje të thella me znj. Hajdari. Kam qenë një mik dhe bashkëpunëtor me Azem Hajdarin, ajo thjesht përfaqëson një emblemë. Ajo thjesht duhet ta ketë të qartë se nuk u afrua më PD për vlerat e saj personale, se ishte një emër i panjohur, por PD e afroi se përfaqësonte një emblemë të PD, të historisë së kësaj partie dhe unë gjykoj e mendoj se Basha bëri mirë që e futi në parlament. Sot është momenti për të treguar vlerat e veta. A do ta gjejë rrugën znj.Hajdari? Kjo është përgjegjësi e saj”,- deklaron Ndoka.
Lidhur me plotësimin e vakancave në Parlament, me deputetë të rinj, Ndoka thotë se kjo është një lojë e Edi Ramës, ndërsa i thekson këtij të fundit se opozita nuk mund të zëvendësohet.
“Jemi përballë kolapsit më të madh të pluralizmit shqiptar dhe këtë e bëri Edi Rama”- tha Ndoka.
