Policia e Durrësit ka vënë në pranga një 19-vjeçar si autor të dyshuar të 5 vjedhjeve. Arrestimi i tij u bë i mundur falë një pune të mirëorganizuar të Specialistëve për Hetimin e Krimit në Komisariatin e Policisë Durrës, të cilët kanë arritur të dokumentojë me prova veprimtarinë kriminale në fushën e vjedhjes së pronës si dhe kanë finalizuar operacionin e koduar “Periferia”.
Gjykata e Rrethit Gjyqësor Durrës , ka caktuar për L.D.,19 vjeç masën e sigurisë “Arrest me burg”, bazuar në provat e grumbulluara nga Policia në bashkëpunim me Prokurorinë.
Si rezultat i hetimeve të kryera dyshohet se ky shtetas ka kryer në periferi të qytetit të Durrësit kryesisht gjatë orëve të natës pesë vjedhje banesash, konkretisht:
Gjatë muajit dhjetor 2018 , janar dhe shkurt 2019, në lagjen nr. 14 Durrës ka vjedhur me thyerje 5 banesa ku ka marrë varëse floriri, televizorë, fshesë me korent, aparate celular, rroba, tapete e sende të tjera.
Materialet i kaluan Prokurorisë pranë Gjykatës së Shkallës së Parë Durrës , në ngarkim të shtetasit L.D., për veprën penale “Vjedhja”.
