Në një intervistë për gazetarin Roland Qafoku në emisionin “Debat” Chanel One, ministri i Brendshëm Fatmir Xhafaj mbrojti arrestimet e protestuesve kuksianë pas mesnatës. Sipas Xhafajt, policia ishte në të drejtën e saj, kur kreu operacionin në Kukës.
Pikërisht për këtë çështje, ish-ministri i Drejtësisë Ylli Manjani citon dy nene ligjore, njërin në Ligjin për Policinë e Shtetit dhe tjetrin në Kodin e Procedurës Penale, që tregojnë se arrestimet kanë qenë të jashtëligjshme.
"Neni 109 është i ligjit për Policinë e Shtetit. Ky nen tregon se kur e si shoqërohet një person në polici. Neni tregon se shoqërimi nuk bëhet për qejf të policisë!!! Vetëm kur personi është në hetim; në ndjekje nga Prokuroria; ka sëmundje ngjitëse; është duke i ikur policisë....
Pra shoqërimi është masë ekstreme ndaj një reagimi ekstrem! Jo për teka, e as hakmarrje shtetërore!" shkruan Manjani.
"Neni 206, është i Kodit të Proçedurës Penale. Ky nen nuk lejon Policinë ti hyjë askujt në banesë, as me vendim gjykate nga ora 20:00 deri në 7:00.
Ky është ligji!" vazhdon ish Ministri i Drejtësisë, që kujton se kuksianët u rrëmbyen në 3:00 të natës nga shtëpitë e tyre, pa vendim gjyqi, pa arsye të ngutshme dhe jo në flagrancë.
"Asnjë surprizë, apo jo?!" është pyetja retorike me të cilën Manjani mbyll reagimin e tij për Ministrin e Brendshëm.
