37 kg heroinë është zbuluar nga policia bullgare në pikën e kontrollit mbi Urën e Danubit në kufi me Rumaninë. Droga ishte fshehur në dyshemenë e një makine të regjistruar në Itali e ndarë në 68 pako.
Është vënë në pranga shoferi i automjetit, një shtetas shqiptar me qëndrim të përhershëm në Itali emri i të cilit nuk jepet ende. Agjencia Kombëtare Doganore e Bullgarisë thotë se makina po tentonte të largohej nga Bullgaria.
Autoritetet thonë se vlera e heroinës në rrugë do të mblidhte rreth 800 mijë euro. Bullgaria është konsideruar një rrugë kryesore tranziti për drogat e trafikuara nga Azia në Evropë. Vetëm në vitin 2017 u kapën në kufi 602.6 kg heroinë.
