Gjykata e Tiranës ka shpallur vendimin përfundimtar ndaj katër të rinjve të akuzuar për “vjedhje me dhunë”. Të dënuarit janë tre djem dhe një vajzë 23-vjeçare, që sipas Prokurorisë, përdorej si “karrem” nga tre bashkëpunëtorët e saj për të futur në kurth të dëmtuarit.
Të pandehurit Fation Bushgjokaj, vëllai i tij i mitur A. Bushgjokaj, Elton Leka dhe Kristina Pjetri janë deklaruar fajtorë dhe kanë marrë dënime që varionin nga 4 deri në 7.5 vite heqje lirie, ndërkohë që përfituan uljen e 1/3 të dënimit për shkak të gjykimit të shkurtuar.
Provat e paraqitura nga Prokuroria kanë bindur Gjykatën për të paktën 4 raste vjedhje, në mars dhe prill të vitit 2017, ku të pandehurit përmes dhunës fizike dhe psikologjike u kanë marrë katër qytetarëve të ndryshëm aparatet celularë, portofolët, si edhe sende me të tjera me vlerë.
Në vendimin e gjykatës, një kopje e të cilit u siguria nga “ABC News” zbardhen episodet e vjedhjeve të dhunshme dhe roli i vajzës në to.
Sipas rrëfimit të të dëmtuarit me iniciale F. K. mbrëmjen e 1 Prillit 2017 teksa teksa po kalonte në rrugën dytësore pranë Kthesës së Kamzës, një vajzë bionde me trup të imët e veshur me kostum sportiv i ka dalë para duke i kërkuar telefonin për të kryer një telefonatë. Më pas, aty janë afruar të pandehurit e tjerë, të cilët i kanë marrë telefonin dhe portofolin dhe e kanë goditur.
Pranë të njëjtës zonë, i dëmtuari me iniciale O. H. ka treguar për prokurorët se i kishte dalë para një vajzë rreth të njëzetave, që i ka kërkuar t’i shtyjë pak makinën. Në ato momente, aty janë afruar miqtë e saj, që e kanë grabitur.
Katër të pandehurit e kësaj dosjeje u arrestuan nga operacioni i koduar “Gracka” në ditët e para të Prillit të vitit të kaluar. Pas ndalimit, një prej tyre u “zbërthye” para prokurorëve duke zbardhur gjithë veprimtarinë e tyre si edhe vendin, ku i kishin fshehur sendet e vjedhura.
