Kanë kaluar plot 27 vite nga rrëzimi i bustit te diktatorit Enver Hoxha, ndërkohë që kreu i PD Lulzim Basha kujton këtë ditë duke u shprehur se sot jemi akoma larg BE. Ai shkruan se shqiptarët do të çlirohen nga e keqja që ka kapur vendin, nga fasada e propagandës së Edi Ramës.
“Pas 27 vjetësh shumë gjëra nuk kanë shkuar si duhet dhe akoma nuk jemi në destinacionin tonë final, Bashkimin Europian. Por, jam i bindur që, së bashku, do t’ia dalim sërish të çlirohemi nga e keqja e re, që ka mbërthyer vendin. Poshtë fasadës së propagandës së Edi Ramës fshihet diktatura e re e krimit në qeveri, diktatura e korrupsionit dhe diktatura e varfërisë! Si dita që ndryshoi historinë për shqiptarët, 20 Shkurti 1991, është ylli ynë polar se kur shqiptarët bashkohen kundër së keqes, nuk ka forcë që t’i ndalë!” – shkruan Basha.
