Prokurorja e Përgjithshme, Arta Marku ngacmoi një temë të nxehtë gjatë mbledhjes me prokurorët e Fierit, atë për abuzimet me taksat të kompanive të sektorit të naftës dhe të gazit. Marku preku një nga temat më të nxehta të momentit, atë për evazionin fiskal të kompanive që kanë punuar në këtë sector, çështje që lidhet direkt me skandalin e ARMO, kur për 10 vjet nuk janë paguar gati 700 milion euro taksa.
“Në Fier operojnë në tregun privat një numër i madh kompanish, duke përfshirë sektorin e naftës dhe gazit. Për vitin 2017 janë hetuar një numër jashtëzakonisht i papërfillshëm në fushën e tatim-taksave, ndërkohë që jemi të vetëdijshëm se sjelljet që cënojnë legjisalcionin tatimor janë të shumta dhe shpesh të ndëshkueshme penalisht.Fshehja e të ardhurave nuk mund të realizohet nga subjektet tregtare pa patur ndihmën dhe bashkëpunimin e nëpunësve të administratës tatimore, të cilët shpeshherë misionin e tyre, atë të mbledhjes së të ardhurave për Buxhetin e Shtetit, e shkëmbejnë me përfitime personale.
Krahas hetimeve ndaj subjekteve që priren të kryejnë evazion fiskal duhet përqëndruar vëmendja te nëpunësit publikë të administratës tatimore” citohet të ketë thënë Prokurorja e Përgjithshme e Përkohshme gjatë mbledhjes me prokurorët.
Siç pohon kryeprokurja, kompanitë që kanë shfrytëzuar sektorin e naftës dhe të gazit janë favorizuar nga indiferenca totale e Tatimeve, por pak ditë më parë, Drejtoresha e Tatimeve Vasilika Vjero mori nga kryeministri Edi Rama çmimin Bleta e Arte.
Çmimi ishte një sfidë ndaj akuzave publike se tatimet nuk kanë vjelur taksat nga kompanitë që shfrytëzuan ARMO-n. Mbetet për t’u parë nëse Arta Marku do ta përdorë këtë çështje vetëm për shoë, apo tatimorëve që kanë toleruar një prej prakikave më kriminale në Shqipëri do të vihen prangat.
Çështja e ARMO-s u rikthye në opinionin publik pas largimit të kompanisë së fundit që shfrytëzoi ndërmarrjen, duke lënë pas miliona euro taksa të papaguara.©Lapsi.al
