Furia e prodhimit muzikor ndër shqiptarë vitet e fundit më gjithëfarë grupesh e këngëtarësh, ka nxjerrë dhe perla të atilla të cilat o të bëjnë të shkulësh flokët nga marrazi, o të mbash barkun nga të qeshurat. Dhe një prej tyre është kënga për Komisar Katanin, personazhin e famshëm të Oktapod-it të fundviteve 90-të, pjesë e repertorit të një grupi të quajtur Dasma Myzeqare. Pra, nga Myzeqeja, një grup muzike dasmash i këndon Komisar Katanit, heroizmit të tij antimafia! Pastaj, teksti është më shumë se katastrofal:
Në një dhomë të vogël rrinin 40 vetë
Në krye të tyre komisari vetë
Komisar, komisar, komisar Katani
Zhduke, zhduke, mafien italiane…
Po s`e zhduka mafian italiane
Mos më thënçin komisar Katani….
Por pjesëtarët e grupit nuk duhen nënçmuar, edhe pse produkti i tyre artistik duket kaq torrollak. Ata duhen kontaktuar, që prej tyre të zbërthehet misteri i mundimshëm se si kanë arritur deri tek ky subjekt kënge? Kush ka qenë ngacmimi fillestar? Si kanë mundur t’i sajojnë vargje të tilla?
Si mundet pra që figura e komisarit të famshëm, kauza e tij gati mbinjerëzore për t’i dhënë dërrmën mafias, të ketë qenë një gurrë kaq frymëzuese për këta shpirtëra burrash myzeqarë?
Ka dhe një mister tjetër që duhet zgjidhur: a është kjo këngë dhe në repertorin e dasmave, pra a luhet dhe nëpër zijafete?!
Nëse po, kjo ja kalon precedentit të këngës së Ali Pashait që është bërë aq e preferueshme në dasmat e jugut, ku teksa intepretohen vargjet plot horror “koka në Stamboll, trupi në Janinë…”, me dhjetra dasmorë hedhin këmbët në valle nën një ndjenjë të parrëfyer ngazëllimi…./tesheshi.com/
