Erjon Braçe nuk e ka duruar ironinë e rubrikës satiriko– politike “Bulevardi Politik” në Gazetën Shqiptare. Gazeta botoi një foto të Braçes në fushatë elektorale, duke thënë se deputetit të PS, për shkak të shtatit të shkurtër, i ishte dashur të hipte mbi një tavolinë për të falenderuar elektoratin e Divjakës për zgjedhjet vendore. Por humori i GSH e ka irrituar deputetin. Ai ka postuar një reagim në Facebook, ku përpiqet t’ia kthej po me humor vënien në lojë gazetës. Braçe shkruan se nuk e ka kompleks gjatësinë, pasi ajo i mjafton për të ngrenë, për të pirë… dhe për të vrapuar. Kuptohet që në vend të tre pikave deputeti i PS nënkupton diçka tjetër, por e plotëson me vrapimin, si për të treguar se as këtë të fundit nuk e ka kompleks dhe se hapat e shkurtër që i mundëson gjatësia, nuk e pengojnë. Më poshtë reagimi i plotë i deputetit socialist.
“Ha ha ha ha ha ha ha ha!! Me gjatësinë time merruni!! Për Gazetën Shqiptare; Për Erlin; Ju jeni seriozë ndaj verifikoni çfarë shkruani; Nuk jam mbi karrige, jam mbi tavolinë!! Nuk jam në festen e fitores, jam në zyrën elektorale!! Është fiks data 22 Qershor dhe ora 14.00; Menjëherë pas proceverbalit të fundit dhe kur fitorja u garantua. Hipa sipër tavolinës për ti parë të gjithë sy me sy, nga tavolina ime deri në metrin e fundit të 12 metrave zyre e ngushtë, i përulur dhe tërësisht mirnjohës ndaj tyre; Ju fola të gjithëve sepse ashtu e ndjeja, ju thashë qartë; FITORE ME VOTA PURO SOCIALISTESH, FITORE ZEMRE E PASIONI. Ndaj mos u merrni fare me gjatësinë time, as që e kam kompleks!! Më mjaftojne 165 centimetra dhe kaq janë plot për të folur, punuar dhe fituar! Natyrisht edhe për të ngrënë, pire dhe … vrapuar!! Kështu që; Faleminderit që keni vemendje ndaj meje por rrini të vërtetë!!”.
