Kryeministri Rama nuk i kursen batutat për qytetarët, kundështarët politikë, por edhe për bashkëpunëtorët e tij, në takimet elektorale apo kur shpërndan tapitë. Por kur ndonjëri e bën pjesë të batutave, ai nuk ndihet mirë. Në Lushnje, ku prezantoi kandidatin e mazhorancës, deputeti Arben Çuko bëri një batutë për gratë, e cila u dëgjua vetëm nga Rama dhe disa prej të pranishmëve në podium. Kur deputeti Çuko mori fjalën, kryeministri i kërkoi të kërkonte ndjesë, por deputeti e nisi fjalën me një tjetër batutë për Ramën. “Jam i kënaqur që kryeministrit tonë ia ka mbledhur gruaja. Edhe mua dhe Tushës na e kanë mbledhur gratë. Këtu te ne thuhet që, burri është nga fshati i gruas së vet”.
