Dy janë akuzat publike që duket se po shoqërojnë prej fillimit shfaqjen e regjisorit Arben Kumbaro. Manipulimi me audicionet dhe plagjatura e spektaklit (përfolur kryesisht kohët e fundit), janë vënë sërish në fokus, por kësaj here nga vetë kolegët e aktorëve të Teatrit Kombëtar. Dyshja e atyre që njihen si “Poetët” në Portokalli, duket se i kanë kushtuar një dialog “Vrasjes së Maratit”, ku Salsano Rrapi dhe Gaz Paja ironizojnë atë që e quajnë shfaqje të Teatrit Botëror.
Skeçi nis me Salsanon në skenë, i cili lidhet me kolegun përmes telefonit. Ky i fundit, ka shkuar për një shfaqje në Teatrin Botëror dhe pasi merr vesh që janë në transmetim live, menjëherë ia nis nga falenderimet “përfitoj nga rasti të përshëndes regjisorin, aktorët, marangozët, rrobaqepsët dhe të gjithë ata që punuan me fotokpjet”, siç thonë zakonisht në të tilla raste aktorët, sapo u vihet një mikrofon përpara.
“Në fakt unë bëra një audicion për këtë shfaqje koleg, i drejtohet Salsano, por nuk e di pse s’fitova?!”
“I kishte zgjedh regjisori më përpara", i përgjigjet njësoj si në rastin Kumbaro, Gaz Paja.
“Po shfaqja është e bukur besoj ëëë?”, vazhdon të pyesë Salsano kolegun e tij, i cili thotë se ka punuar me rolin e kësaj shfaqje duke e kopjuar nga youtube: “Unë kam atë rolin e atij aktorit anglez që të tregova në youtube, fiks e kam, fiks siç e ka bërë ai.”
Në vijim të plagjaturës, paralel me akuzat që i janë drejtuar regjisorit Kumbaro, si kopjac i shfaqjes “Vrasja e Maratit”, duket se bën lidhjen edhe pjesa e fundit e dialogut mes dy poetëve.
“Shfaqja është shumë e bukur po mos e ki pishman se e shofim në darkë në youtube”, i thotë Gaz Paja nga telefoni Salsano Rapit. Ky i fundit që akoma nuk po i beson veshëve e pyet: “Si në youtube koleg, a është premierë sot?".
“Premierë është në Shqipëri, por në botë ka 50 vite që ka dalë premiera”, batutë që mbyll ironinë e dyshes së aktorëve të Portokalli me shfaqjen e shumëpërfolur “Vrasja e Maratit”.
Video e parodisë:
