Amanda Seyfried dhe Thomas Sadoski kanë konfirmuar ndarjen pas nëntë vitesh martesë. Në një deklaratë për People, aktorët thanë se janë ndarë prej kohësh dhe se ky ishte vendimi i duhur për ta dhe familjen e tyre.
“Do ta kemi njëri-tjetrin përgjithmonë — dhe kjo është gjë e mirë”, u shprehën ata.
Çifti u njoh në vitin 2015, gjatë shfaqjes off-Broadway “The Way We Get By”, dhe u martua në fshehtësi në vitin 2017.
Sadoski kishte treguar se ceremonia ishte zhvilluar në një ambient privat, vetëm me praninë e tyre dhe një celebruesi. Ai e kishte përshkruar Seyfried si personin që “do, admiroj dhe respektoj më shumë në botë”.
Gjatë martesës, ata u bënë prindër të dy fëmijëve, vajzës Nina, 9 vjeç, dhe djalit Thomas, 5 vjeç. Seyfried kishte folur më herët për vështirësitë e balancimit të karrierës me rritjen e fëmijëve, ndërsa në një intervistë për Vogue kishte thënë se Sadoski “sakrifikon shumë” për të.
Pavarësisht ndarjes, çifti ka theksuar se do të vazhdojë të jetë i pranishëm në jetën e njëri-tjetrit dhe të ruajë lidhjen si familje për fëmijët e tyre.
