Milan dhe Juventus nuk kanë justifikime: në Europa League duhet patjetër të paraqiten mirë. Çështje prestigji po, por edhe financash. Të arrish deri në fund do t’u garantonte të ardhura të konsiderueshme ekonomike dy klubeve, të cilëve u duhet të mbushin boshllëqe të rëndësishme në bilanc pas mungesës në Champions League. Ngritja e trofeut në qiell do të ndihmonte bilancin: në rast të një ecurie perfekte mund të vijnë 45-50 milionë euro.
Kompeticioni i dytë kontinental për klube ka një fond total prej 565 milionë eurosh, që ndahet mes klubeve në bazë të fitoreve, kalimit të raundeve dhe jo vetëm. Juve dhe Milan kanë një të ardhur minimale të garantuar, përkatësisht 14,4 dhe 13,5 milionë euro: diferenca me atë të Champions është e jashtëzakonshme. Diferenca për Zonjën e Vjetër është rreth 33 milionë, ndërsa për kuqezinjtë jemi rreth 25 milionë.
Siç mund të imagjinohet lehtësisht, rezultatet në fushë do të bëjnë diferencën: çdo fitore vlen 450 mijë euro, dukshëm më shumë se një barazim që garanton vetëm 150 mijë euro. Parashikohen gjithashtu bonuse të lidhura me pozicionin në renditjen e përgjithshme të fazës së parë: përfundimi në tetë vendet e para garanton 600 mijë euro të tjera. Dyfishin e shumës që merr skuadra e renditur nga vendi i nëntë deri në të 16-in, e cila është e detyruar të luajë play-off-in. Pa harruar shumën e përcaktuar në bazë të pozicionit në renditje: nga 75 mijë euro për vendin e 36-të deri në 2,7 milionë euro në rast se përfundon në krye.
Dhe akoma: raundi i 1/8-ve lejon të arkëtohen 1,75 milionë, çerekfinalja 2,50 milionë dhe 4,2 milionë për gjysmëfinalen. Arritja në finale, përkundrazi, sjell plot 7 milionë euro. Fitimi i kupës sjell edhe 6 të tjera. Me pak fjalë, në rast të një ecurie perfekte, duke shtuar edhe të ardhurat nga biletat (sa më shumë ndeshje luan, aq më shumë arkëton), Juve dhe Milan mund të arrijnë në shifrën 45-50 milionë euro. Natyrisht, bëhet fjalë për një vlerësim dhe për shifra shumë larg atyre që lidhen me Champions League.
