Egnatia e nis mbrojtjen e titullit në mënyrën më bindëse të mundshme. Kampionët në fuqi mposhtën 3-0 Tiranën në Rrogozhinë, në një ndeshje të kontrolluar thuajse tërësisht prej tyre dhe të vendosur praktikisht që në 45 minutat e para. Skuadra e Nevil Dedes tregoi qartësi në lojë, efikasitet përpara portës dhe një pjekuri të dukshme në menaxhimin e avantazhit, duke i dhënë menjëherë një sinjal rivalëve se mbetet një skuadër që duhet marrë seriozisht në garën për titull.
Egnatia me rezerva, Tirana e cunguar
Diferenca mes dy ekipeve u bë e dukshme që në minutat e para. Egnatia hyri në fushë me ritëm dhe agresivitet, duke mos i lënë Tiranës kohë të organizohej dhe duke e detyruar të mbrohej pranë zonës së saj. Presioni i vendasve u shpërblye shumë shpejt. Në minutën e 9', Diabate gjeti rrugën e rrjetës dhe i dha Egnatias avantazhin, duke vendosur menjëherë ndeshjen në trajektoren e dëshiruar nga kampionët.
Tirana u përpoq të reagonte, por e pati të vështirë të gjente hapësirat e nevojshme për të shqetësuar seriozisht mbrojtjen rrogozhinase. Përkundrazi, Egnatia vazhdoi të kontrollonte ritmin dhe të kërkonte golin e dytë. Ai mbërriti rreth 20 minuta pas avantazhit të parë. Këtë herë ishte mbrojtësi Ajeti që realizoi, duke e çuar rezultatin në 2-0 dhe duke e bërë edhe më të komplikuar misionin e kryeqytetasve.
Në këtë pikë, ndeshja nisi të marrë gjithnjë e më shumë pamjen e një triumfi të sigurt për vendasit. Tirana nuk arrinte të gjente kundërpërgjigjen, ndërsa Egnatia shfrytëzonte më së miri epërsinë e krijuar. Goditja përfundimtare erdhi pak para pushimit. Sota u bashkua me listën e golashënuesve dhe realizoi golin e tretë, duke e mbyllur praktikisht sfidën që në pjesën e parë.
Egnatia menaxhon avantazhin, Tirana nuk gjen zgjidhje
Pas pushimit, ritmi i ndeshjes ndryshoi. Me avantazhin e trefishtë në favor, Egnatia nuk kishte më nevojë të rrezikonte dhe zgjodhi të administronte me qetësi rezultatin. Kampionët ruajtën kontrollin e lojës dhe nuk i dhanë Tiranës mundësinë për të rikthyer emocionet në një takim që ishte vendosur shumë herët.
Kryeqytetasit u përpoqën të krijonin diçka më shumë në fazën ofensive, me Xhixhën dhe Alvarez që tentuan të sillnin rrezik në zonën e Egnatias. Megjithatë, përpjekjet e tyre nuk mjaftuan për të ndryshuar historinë e ndeshjes. Mbrojtja e vendasve u tregua e konsoliduar dhe, mbi të gjitha, Egnatia pati meritën që nuk lejoi që kundërshtari të përfitonte nga ndonjë moment dobësie. Në fund, 3-0 ishte një rezultat që pasqyroi qartë atë që ndodhi në fushë, veçanërisht në 45 minutat e para. Egnatia mori tri pikët e para dhe dha një mesazh të fortë që në startin e kampionatit: kampionët nuk kanë ndërmend të heqin dorë lehtë nga statusi i tyre.
Për Tiranën, ndërkohë, kjo është një nisje që kërkon reflektim. Skuadra kryeqytetase u shfaq e pafuqishme përballë një kundërshtari më të organizuar dhe më efikas, ndërsa situata e krijuar nga bllokimi i merkatos e ka kufizuar ndjeshëm mundësinë për të ndërhyrë në përforcimin e ekipit. Për këtë arsye, sfida e parë e sezonit nuk ishte thjesht një humbje me shifra të thella, por një tregues i qartë se Tirana ka ende shumë për të rregulluar nëse synon të jetë konkurruese në javët e ardhshme.
