Episodi i parë i sezonit të Serie A për t’u analizuar nga pamjet e përsëritura vjen nga Meazza dhe nga ndeshja ku Inter mposhti Monzën me shifrat bindëse 4-1. Në qendër të vëmendjes është goli i skuadrës zikaltër me goditjen nga distanca të Calhanoglu, e cila befasoi Pizzignacco-n. Çështja e debatit është pozicioni jashtë loje i Bisseck dhe fakti që ai mund të ketë qenë në trajektoren e goditjes, duke e penguar portierin të kuptonte mirë drejtimin e topit. Pse goli u akordua, pavarësisht pengimit të mundshëm të pamjes?
Bisseck në pozicion jashtë loje në golin e Calhanoglu, polemika për pozicionin e tij
Rregullorja është e qartë, sidomos në rastet kur një futbollist merr pjesë aktivisht në lojë duke “ndërhyrë” përmes pengimit të trajektores së goditjes fituese dhe duke e penguar portierin ta lexojë atë. Në këto raste goli duhet anuluar pa diskutim, edhe nëse lojtari në pozicion jashtë loje nuk e prek topin. Megjithatë, vlerësimi se sa është penguar pamja është në diskrecionin e arbitrit, i cili mund të thirret nga VAR-i për një rishikim në fushë (On-Field Review).
Pse goli nuk u anulua
Asnjë dyshim për arbitrin, i cili vlerësoi kështu se pozicioni i Bisseck nuk ndikoi në aftësinë e portierit për të reaguar. Edhe pse mbrojtësi i Interit u zhvendos — gjë që konfirmon se topi po vinte pikërisht në pozicionin e tij — duhet marrë parasysh se nga ku u nis goditja. Para së gjithash, si Calhanoglu, ashtu edhe Bisseck ishin larg portës, ndërsa i dyti nuk ishte në zonën e vogël. Sigurisht, ai ishte në trajektoren e topit, por Pizzignacco mundi ta shihte qartë nisjen e topit.
Shpjegimi i Luca Marellit
Një koncept i shpjeguar nga Luca Marelli, ekspert i situatave arbitrale në DAZN, i cili theksoi: “Në goditjen e Calhanoglu, Bisseck përpiqet në çdo mënyrë të shmangë kontaktin me topin. Gjatë viteve të fundit kemi parë që shumë shpesh anuloheshin gola për shkak të pozicionit jashtë loje, kur lojtari ndodhej në vijën e shikimit të portierit. Siç mund ta shihni, mbi të gjitha vërehet nga pamja e gjerë e fushës, nga lart, në goditjen e Çalhanoglu portieri nuk e humb kurrë kontaktin me topin, sepse topi kalon në të djathtë të lojtarit të Interit, Bisseck, dhe nuk ia pengon kurrë portierit të Monzës pamjen e topit, arsye për të cilën ai gol është i rregullt”.
Gjërat do të kishin shkuar ndryshe nëse mbrojtësi do të kishte qenë shumë më pranë portierit të Monzës. Për shembull, nëse do të kishte qenë në “zonën e vogël” dhe do të kishte ndikuar plotësisht në pamje, nuk do të kishte pasur dyshime për anulimin.
