Janë publikuar momente interesante nga takimi midis presidentit amerikan Donald Trump dhe atij sirian Ahmad Al-Sharaa në Uashington. Ky i fundit mbërriti në Shtëpinë e Bardhë përmes një hyrjeje anësore dhe gazetarët nuk u lejuan në Zyrën Ovale.
Pamjet tregojnë pritjen e ngrohtë që presidenti i SHBA i bëri kreut të shtetit sirian, i pari në histori që kryen një vizitë të tillë.
“Ky është parfum për burra”, - tha Trump ndërsa hoqi kapakun e artë nga shishja e tij e parfumit dhe spërkati udhëheqësin sirian. “Ky është parfumi më i mirë”, - tha Trump, duke vënë në dukje se do t'i dhuronte një shishe edhe për gruan e tij.
Më pas Trump bëri shaka: “Sa gra ke? Një?” Kur Shaara, qeshi dhe konfirmoi se kishte vetëm një grua, Trump i përkëdheli dorën në mënyrë miqësore dhe tha me një buzëqeshje: “Pyes sepse asnjëherë nuk i dihet me ju djem”.
Presidentit sirian nuk iu lejua të ngiste limuzinën e tij në Krahun Perëndimor, nuk kishte flamuj, as roje nderi, as shtrëngime duarsh para kamerave. Vetura e tij u pa në hyrjen nëntokësore, e cila normalisht përdoret në raste emergjence. Një ditë pas vizitës në Shtëpinë e Bardhë, presidenti sirian njoftoi se vendi i tij ishte bashkuar me koalicionin global kundër Shtetit Islamik.
Në këmbim, Trump zgjati një përjashtim nga sanksionet sipas “Aktit të Cezarit”, një ligj i futur për shkeljet e të drejtave të njeriut nën regjimin e Bashar-al Assad. Heqja e plotë e sanksioneve do të duhej të miratohej nga Kongresi. Trump nuk e fshehu përshtypjen që al-Shaara i la atij.
“Ai vjen nga një mjedis shumë i vështirë dhe është një njeri i ashpër. Më pëlqen”, - tha Trump. ©LAPSI.al
