Mediat dhe agjencitë ndërkombëtare i kanë bërë jehonë asaj që ndodhi këtë të diel në parlamentin e Kosovës i cili dështoi të zgjedhë Albin Kurtin si kryeministër. "Reuters" shkruan se kjo ka rritur gjasat që të shpallen zgjedhje të parakohshme për të thyer një ngërç politik që zgjat që nga parlamentaree mbajtura në shkurt.
Reuters shkruan se Kurti, kreu i partisë Vetëvendosje, i cili aktualisht shërben si kryeministër në detyrë, mori vetëm 56 vota në parlamentin me 120 vende - 5 më pak se shumica e nevojshme për të formuar një qeveri.
Partitë opozitare, Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK), votuan kundër kandidaturës së Kurtit.
“Mbetet e paqartë nëse presidentja e vendit do t'i kërkojë partisë së vendit të dytë apo të tretë të formojë një qeveri. Të dyja kanë thënë se mendojnë se duhet të mbahen zgjedhje të reja.
Partitë opozitare kanë refuzuar të qeverisin me Kurtin, duke kritikuar mënyrën se si ai i trajtoi marrëdhëniet e Kosovës me aleatët e saj perëndimorë dhe veprimet e tij në veriun e ndarë etnikisht të Kosovës, ku jeton një pakicë serbe.
Kurti, një nacionalist i majtë dhe shqiptar, erdhi në pushtet në vitin 2021 kur një koalicion i drejtuar nga Vetëvendosja mori më shumë se 50% të votave dhe siguroi një shumicë prej 7 vendesh në parlament” – nënvizon Reuters.
Edhe agjencia e lajmeve “Bloomberg” shkruan se Kosova po shkon drejt zgjedhjeve të parakohshme pasi kryeministri Albin Kurti nuk arriti të sigurojë vota të mjaftueshme për të formuar një qeveri të re të dielën.
Sipas saj, deputetët u takuan gjatë orëve të fundit të afatit për të ngritur një administratë të re, por Kurti nuk arriti të fitonte miratimin parlamentar për kabinetin e propozuar prej tij. ©Përgatiti LAPSI.al
