Fatjon, Kristi dhe Aleksandër Bushgjokaj janë tre vëllezërit që dyshohet se kanë organizuar rrëmbimin dhe vrasjen e Renis Dobrës në lumin e Shkopetit. Vëllezërit me origjinë nga Tropoja dhe banues në Kamëz, janë të dyshuarit kryesorë për rrëmbimin, torturimin dhe vrasjen e Dobrës.
Së bashku me ta si i përfshirë në krim dyshohet se është dhe miku i tyre, Petrit Çakrri, një nga dëshmitarët e vrasjes së Azem Hajdarit. Bashkë me Çakrrin, për ngjarjen është arrestuar edhe Fatjoni, ndërsa të tjerët janë në kërkim.
Ngjarja e 8 korrikut dyshohet se shkak ka prishjen e pazareve të drogës. Çakri u arrestua sot në Lekbibaj të Tropojës, kurse Fatjon Bushgjoka në Tiranë. Çakri ka pranuar për grupin e hetimit që kishte udhëtuar drejt fshatit Madhesh të Matit së bashku me vëllezërit Bushgjokaj pasi ata i kishin thënë se do gjenin drogë.
Duke iu referuar burimeve, gazetarja e Top Channel, Anila Hoxha raportoi se Çakri kishte njohur në burg njërin nga tre vëllezërit. “Kam qenë në burg me Kristin”, - mësohet të jetë shprehur i dyshuari. Ai ka shtuar se mbaroi dënimin në prill të këtij viti dhe vazhdoi t’i mbajë kontaktet me shokun e qelisë, sot në kërkim për vrasjen e Renis Dobrës.
Duke iu referuar dëshmisë së Çakrit, theksohet se grupi i hetimit disponon të dhëna se si vëllezërit ndryshuan makina të shumta dhe se si gjatë udhëtimit u ulën në disa kafe.
“Unë isha në makinën tjetër dhe nuk më treguan, nuk di gjë se çfarë ndodhi me djalin, në lajme e pashë që ishte vrarë. Ata më thanë ik”, mësohet të ketë shpjeguar i dyshuari për rrëmbimin dhe më pas vrasjen e 23 vjeçarit. Nga këqyrja e GPS hetuesit kanëbindjen se vrasja e të riut është kryer brenda 30 minutave prej rrëmbimit të tij. /LAPSI.al
