Rreth 1 mijë persona u mblodhën në vendin ku shqiptari Nikollaq Hudhra vrau ish-bashkëshorten e tij, Gentiana Kopilin pak ditë më parë në Tolentin të Italisë. Në demonstrimin kundër dhunës morën pjesë autoritetet më të larta lokale si kryebashkiaku i Tolentinos Mauro Sclavi, prefektja Isabella Fusiello dhe guvernatori Francesco Acquaroli.
Stolit ku autori u ul pasi qëlloi për vdekje ish-bashkëshoren do të mbajë emrin e Gentianës. Në ceremoni mori pjesë edhe djali i viktimës (foto kryesore) që falënderoi të pranishmit. “Nëna ime ka qenë gjithmonë e sjellshme me të gjithë” – tha djali i 45-vjeçares.
“Dhuna duhet të përjashtohet dhe secili prej nesh në këto beteja duhet të jetë në vijën e parë në mënyrë që ajo që i ndodhi Gentianës të mos ndodhë më kurrë” – tha guvernatori Acquaroli.
Prefektja Isabella Fusiello u shpreh se ngjarje të tilla “janë të mundura të parandalohen. Ligji tani lejon miqtë, fqinjët, të afërmit të raportojnë në mënyrë anonime në polici, për të ndihmuar viktimat”.
Ndër pjesëmarrëset ishte edhe këshilltarja rajonale Linda Elezi, e cila mbajti një fjalë prekëse, duke theksuar se ligjet nuk mjaftojnë për të shpëtuar jetë si ajo e Gentianës. Sipas saj, duhet të punohet më shumë me ndërgjegjen shoqërore dhe respektin për veten e për të tjerët. ©LAPSI.al
