Televizioni shtetëror iranian njoftoi se Teherani ka lëshuar raketa hipersonike kundër Izraelit. Raketat Fattah "depërtuan me sukses mbrojtjen e regjimit izraelit", - tha televizioni në ditën e gjashtë të luftës. Raketat e hedhura kundër shtetit hebre kanë tërhequr vëmendjen e ekspertëve. Fotot që qarkulluan menjëherë në mediat sociale treguan një trajektore të çuditshme. Fattah-1 mund të arrijnë një shpejtësi më të madhe se “Mach 13”.
Menjëherë pas lëshimit, përdorues të shumtë të mediave sociale ndanë foto të raketës: një gjurmë e lakuar dhe e ndritshme, shumë e ngjashme me atë të dokumentuar në vitin 2024 gjatë një prove raketore ruse. Në atë kohë, ishte një raketë eksperimentale me rreze të gjatë veprimi me një trajektore jokonvencionale. Tani, krahasimi vizual i ka shtyrë disa analistë të hipotetizojnë përdorimin e një sistemi balistik të përparuar, ndoshta të aftë të shmangë sistemet mbrojtëse me manovra gjatë fluturimit.
Fattah-1 klasifikohet si një raketë balistike hipersonike me rreze të mesme veprimi (MRBM). Ka një rreze veprimi prej afërsisht 1400 kilometrash, e mjaftueshme për të arritur objektiva në të gjithë Lindjen e Mesme. Shpejtësia e saj vlerësohet midis Mach 13 dhe Mach 15 (mbi 15 000 km/orë), me shtytje me lëndë djegëse të ngurtë. Është e pajisur me një mjet të manovrueshëm rihyrës (MaRV), i cili lejon ndryshime minimale të trajektores në fazën përfundimtare.
Saktësia vlerësohet në 10-25 metra pasi përdor një sistem udhëzimi INS të kombinuar me GNSS. Megjithatë, ajo nuk ka aftësitë e sistemeve më të përparuara hipersonike kineze ose amerikane. Fattah-1 shënon një hap të madh në aftësinë raketore iraniane. Ndonëse nuk është i krahasueshëm me raketat balistike ndërkombëtare (ICBM) për sa i përket rrezes së veprimit ose manovrimit ekstrem, përdorimi i saj aktualisht tregon se Irani ka kaluar fazën e testimit dhe tani mund të përdorë armë me shpejtësi hipersonike në një luftë reale.
Ky nuk është vetëm një mesazh për Izraelin, por edhe për Shtetet e Bashkuara, Arabinë Saudite dhe Evropën, të cilat tani po vënë në pikëpyetje qëndrueshmërinë e mbrojtjes së tyre kundër raketave të gjeneratës së re. /LAPSI.al
