Sarah Jessica Parker ka rrëfyer së fundmi në podcastin e Kristin Davis, “Are You a Charlotte?”, se u ndje shumë e pasigurt kur HBO vendosi të vazhdonte me prodhimin e serialit “Sex and the City” në fund të viteve ’90.
Aktorja tha se kishte një përvojë shumë të këndshme gjatë xhirimeve të episodit të parë në vitin 1997, por nuk kishte menduar seriozisht për atë që mund të ndodhte më tej. “Kur seriali u miratua, u panikosa,” tha ajo. “Thashë me vete: ‘Nuk mund të jem në një serial televiziv. Nuk mendoj se jam e përshtatshme për këtë jetë.’”
Parker madje kontaktoi agjentët e saj dhe u kërkoi ta nxirrnin nga marrëveshja. Ajo ofroi të bënte disa filma për HBO për të përmbushur kontratën, në vend që të vazhdonte me serialin.
Por agjentët e saj i bënë presion që të provonte vetëm për një vit. “Nëse nuk do që ta vazhdosh, nuk do ta bëjmë,” i thanë ata.
Edhe pse ajo kishte pasur përvoja të mëparshme në seriale si “Square Pegs” dhe “A Year in the Life”, ato kishin qenë projekte afatshkurtra. Ishte ideja për të bërë të njëjtën gjë çdo ditë që e shtypte emocionalisht. “Kjo më trishtonte. Ishte si të vendosnin dorën mbi gojën time,” shpjegoi ajo.
Por gjithçka ndryshoi kur takoi stilisten ikonike të veshjeve, Patricia Field, gjatë përgatitjeve për serialin. Nga ai moment, përvoja u kthye nga “një ide shtypëse” në një botë me “mundësi të pafundme”.
Në ditën e parë të xhirimeve, ajo kujton se kishte ecur nga apartamenti i saj në Nju Jork deri te vendi i xhirimeve: një dyqan Banana Republic . “Dhe nuk ktheva më kokën pas,” tha ajo. “Nuk ka pasur ditë kur nuk kam qenë e lumtur që isha atje.”
Seriali “Sex and the City” u transmetua nga viti 1998 deri në 2004 dhe i solli Sarah një çmim Emmy si aktorja më e mirë në një serial komedi. Më vonë, u realizuan dy filma (2008 dhe 2010), dhe më pas ajo u rikthye në vazhdimin “And Just Like That…”, i cili debutoi në 2021. Sezoni 3 i këtij seriali pritet të dalë këtë muaj.
