Scarlett Johansson ka shprehur zhgënjimin e saj për faktin që filmi “Avengers: Endgame” nuk u nominua kurrë për një çmim Oscar për Filmin më të Mirë, pavarësisht suksesit të jashtëzakonshëm dhe ndikimit të tij kulturor.
“Si nuk u nominua ky film për Oscar?” tha ajo në një intervistë për Vanity Fair. “Ishte një film i pamundur që nuk duhej të funksiononte, por funksionoi. Dhe është një nga filmat më të suksesshëm të të gjitha kohërave.”
Ndryshe nga “Endgame”, vetëm “Black Panther” ka arritur të marrë një nominim për Filmin më të Mirë nga Marvel.
Filmi i vitit 2019 përfundoi historinë e personazhit të Johansson, Natasha Romanoff/Black Widow, të cilin ajo e interpretoi që nga viti 2010.
Aktorja theksoi se nuk sheh një mënyrë ku kthimi i saj në universin Marvel do të kishte kuptim. “Historia e saj është e plotë. Nuk dua ta prish këtë,” tha ajo.
Johansson kritikoi gjithashtu ceremoninë e fundit të çmimeve Oscar, duke u tallur me zgjatjen e saj:
“Pse ishte kaq e gjatë?” – u shpreh aktorja, duke shtuar se momenti i gjatë i nderimit për James Bond-in dukej si një reklamë, jo një tribut i sinqertë.
Aktorja ishte gjithashtu në qendër të vëmendjes në vitin 2021, kur paditi kompaninë Disney, duke i akuzuar për shkelje kontrate pasi filmi “Black Widow” u publikua njëkohësisht në kinema dhe në Disney+. Më pas, palët arritën një marrëveshje konfidenciale.
Johansson do të rikthehet në ekran këtë verë me filmin “The Phoenician Scheme” më 6 qershor dhe “Jurassic World: Rebirth” më 2 korrik.
Filmi i radhës në serinë Marvel, “Avengers: Doomsday”, pritet të publikohet në maj 2026.
