Michael Pitt, aktori i njohur nga “Dawson’s Creek” dhe “Boardwalk Empire”, është arrestuar për akuza të rënda për dhunë seksuale dhe fizike ndaj ish-të dashurës së tij.
Sipas dokumenteve gjyqësore të siguruara nga Page Six, katër incidente të ndara dyshohet se kanë ndodhur në shtëpinë e aktorit në Brooklyn mes prillit 2020 dhe gushtit 2021.
Prokurorët thonë se Pitt e ka ngacmuar ish-partneren, më pas e ka sulmuar seksualisht dhe fizikisht duke përdorur një dërrasë druri dhe një bllok betoni. Në një rast tjetër në gusht 2021, ai dyshohet se e ka mbytur me duar.
Pitt është deklaruar i pafajshëm në gjykatë dhe ka dalë me një garanci prej 15,000 dollarësh. Avokati i tij e ka përshkruar atë si një “profesionist të përkushtuar që nuk do të mendonte kurrë të kryente këto krime” dhe ka akuzuar viktimën si një “individ të paqëndrueshëm”, duke shtuar se do të provojnë pafajësinë e tij me prova, jo me media.
Aktori ka qenë i arrestuar më parë në korrik të vitit 2022 dhe u akuzua për sulm dhe vjedhje, pasi dyshohet se i kishte marrë telefonin një burri dhe e kishte goditur disa herë. Ai raportohet se ishte shtruar në spital dhe u cilësua si “i trazuar emocionalisht” pasi më vonë atë vit u akuzua se kishte hedhur sende ndaj njerëzve nga çatia e një ndërtese.Michael Pitt do të paraqitet sërish në gjykatë më 17 qershor.
