Kryeministri Edi Rama ka zgjedhur të kthejë në slogan elektoral luftën kundër pandëshkueshmërisë, duke u shfaqur në Shkodër përpara të rinjve socialistë me mesazhe për drejtësinë e re dhe standardet evropiane. Por, ndërsa flet për “shpatën e drejtësisë” dhe për “njerëz me pushtet që thirren për të dhënë llogari”, Rama bën fushatë me emra që deri dje kanë qenë bashkëpunëtorët më të afërt të tij – dhe sot janë të arrestuar nga SPAK.
“Thembra e Akilit për shqiptarët ka qenë mungesa e barazisë para ligjit,” tha ai, duke shtuar: “Për herë të parë po shohim njerëz të fuqishëm të lidhur me pushtetin politik. Po thirren e po ju kërkohen llogari para një drejtësie që nuk kontrollohet nga pushteti politik.”
Me këtë fjali, Rama i referohet ish-ministrave, ish-kryebashkiakëve dhe drejtorëve të akuzuar për korrupsion, që më parë kanë qenë pjesë e qeverive të tij – një realitet që e injoroi gjatë viteve të sundimit të tyre, dhe që sot e përdor si dëshmi të “rilindjes morale”.
“Ne sot kemi pushtetin, e kemi bërë dorëzimin e shpatës së ndëshkimit që normalisht është në duart e drejtësisë dhe nuk është asnjëherë në duart e pushtetit në një demokraci,” deklaroi ai.
Kryeministri e krahasoi veten me një revolucionar që ka çliruar drejtësinë nga politika:
“Shpata ishte te zyra ime, para se të isha unë, shpata ishte te zyra e atij tjetrit, deri në 1912. Drejtësia ishte komplet nën urdhërat e pushtetit politik”-tha ai.
Duke folur për figurën e Altin Dumanit, kreun e SPAK-ut, Rama theksoi se asnjë prej të rinjve nuk kishte dëgjuar më parë për të:
“Altin Dumani po t’ju them unë, të gjithë e njihni. Altin Dumani ka 20 vjet prokuror, kishit dëgjuar për të? A kishit dëgjuar ndonjëherë për ndonjë ministër me pushtet që shkonte në prokurori të jepte llogari, të dënohej apo të arratisej? As ju s’keni parë, as prindërit tuaj dhe as gjyshërit.” u shpreh ai.
Ironikisht, shumica e atyre që “japin llogari” sot, janë të njëjtët që Rama i ka pasur në krah në mbledhje qeverie, në fushata, dhe në ndarjen e PPP-ve. Një pjesë janë ende në listat e Partisë Socialiste si kandidatë, të tjerë janë zëvendësuar me “Lali të rinj”.
