Deputeti i PD-së Dashnor Sula ka komentuar listat e kandidatëve për deputetë në zgjedhjet parlamentare të 11 majit. Ai shpjegoi arsyet se pse u dorëhoq nga gara elektorale e 11 majit dhe se tashmë është duke diskutuar në këto orë të fundit për një aleancë me LZHK-në e Dashamir Shehit.
“PD në Elbasan nuk i kalon 5 mandate, i kam shanset "zero" që të fitoj në listën e hapur. Në PD është bërë një listë besnikësh”, - tha Sula. Ai u shpreh se në PD ka një pjesë të mirë të deputetëve që janë lëpirës ndaj kryetarit.
Sula tha se ai ka qenë parimor dhe ka patur kontribute në PD. Në cdo garë, tha ai, ka sjellë vota më shumë se kushdo, edhe pse ata bëjnë karrierë brenda strukturës së PD.
Ai u shpreh se zhbërja e parlamentit nisi në 2009, kur nga PD u larguan me një të rënë të lapsit, Bamir Topi dhe grupi i tij. Sula thotë se ka qenë ndër të paktët që mbeti në grupin e PD, por nuk e pa veten në listat e PD të 11 majit.
“Në 2009 filloi shpërbërja, me një të rënë të lapsit ikën të gjithë pas Bamir Topit, iku dhe Oketa, mbeta vetëm unë. Pastaj erdhën trafikantët, u detyrua parlamenti që të bënte ligj për pastrimin e vetëvetes.
A e dini që unë nuk njihja deputetët në parlament, 4 vjet ata nuk kanë bërë aktivitete politike. Kjo listë ka figura të mira, por ka dhe lista që nuk kanë përfaqësime si duhet”, - tha Sula duke shtuar më tej se ai po sheh aleancë me Dashamir Shehin. /BW
