Në javën e 23-të të Bundesligës, Bayer Leverkusen nuk gabon dhe mposht në transfertë Kiel-in me rezultatin 2-0: vendimtarë Patrick Schick (9’) dhe Amine Adli (45’). Xabi Alonso ngushton diferencën me Bayern Munich në -5, ndërsa bavarezët luajnë të dielën në shtëpi kundër Eintracht Frankfurt. Borussia Mönchengladbach pëson një disfatë të rëndë, duke u mundur 3-0 nga Augsburg, që u udhëhoq nga një tregolësh i Claude-Maurice. Wolfsburg nuk shkon më shumë se barazimi 1-1 në shtëpi me Bochum, ndërsa Mainz mposht St. Pauli-n 2-0.
KIEL - BAYER LEVERKUSEN 0-2
Fitore e lehtë për Bayer Leverkusen, që triumfon 2-0 në fushën e Kiel. Miqtë nisin furishëm, duke krijuar shumë raste nga goditjet e këndit dhe situatat e topit të ndalur. Pikërisht nga një goditje këndi vjen goli i parë: në minutën e 9-të, Adli harkon nga e majta, portieri Weiner devijon, por Schick ndodhet në vendin e duhur dhe shtyn topin në rrjetë për 1-0. Pas avantazhit, Leverkusen ul ritmin dhe i jep hapësira vendasve, të cilët kanë një mundësi të mirë me Knudsen, por portieri Kovar reagon mjaft mirë. Në fundin e pjesës së parë, mbrojtja e Kiel gabon sërish dhe në minutën e 45-të vjen goli i dytë: Wirtz shërben një asist perfekt për Adli, i cili me një parabolë të bukur shënon për 2-0.
Lexo më tej: Video/ Leverkusen ndalet nga trarët, Bayern reziston: Kompany mban larg Xabi Alonson
Në pjesën e dytë, ritmi bie ndjeshëm, me Kiel që përpiqet të reagojë, por pa shumë sukses. Leverkusen menaxhon qetësisht lojën dhe në disa raste rrezikon të shënojë të tretin me Wirtz, por pa qenë i saktë. Ndeshja përfundon 2-0 për ekipin e Xabi Alonsos, që ngjitet në kuotën e 50 pikëve, përkohësisht -5 nga Bayern Munich, i cili luan të dielën kundër Eintracht Frankfurt. Kiel mbetet në fundin e tabelës me 13 pikë.
MAINZ - ST. PAULI 2-0
Mainz merr tre pikë të rëndësishme, duke fituar 2-0 ndaj St. Pauli me dy gola në pjesën e dytë. Në fillim, miqtë përpiqen të surprizojnë kundërshtarët dhe janë pranë golit me një goditje të Weisshaupt, që përplaset në shtyllë. Në minutën e 22-të, St. Pauli fiton një penallti, por pas rishikimit në VAR ajo anulohet. Loja mbetet e balancuar deri në fundin e pjesës së parë, e cila mbyllet pa gola (0-0).
Në pjesën e dytë, St. Pauli nis shumë më mirë dhe krijon disa raste të rrezikshme. Por, në momentin e tyre më të mirë, janë vendasit që kalojnë në avantazh: në minutën e 67-të, Jae-sung Lee shënon për 1-0. Miqtë përpiqen të reagojnë, por në minutën e 95-të Nebel vulos fitoren me golin e dytë të Mainz. Me këtë fitore, Mainz ngjitet në kuotën e 38 pikëve, vetëm një pikë larg Freiburgut. St. Pauli mbetet në kuotën e 21 pikëve, menjëherë mbi zonën e play-out.
BORUSSIA MÖNCHENGLADBACH - AUGSBURG 0-3
Një disfatë e rëndë për Borussia Mönchengladbach, që pëson një humbje 3-0 në shtëpi kundër Augsburg. Në minutat e para të ndeshjes, ritmi është i ulët, me vendasit që përpiqen të mbajnë topin, por pa shumë rrezik. Në minutën e 28-të, vjen momenti vendimtar: portieri i Mönchengladbach, Omlin, ndëshkohet me karton të kuq për faull si lojtar i fundit.
Megjithatë, pavarësisht inferioritetit numerik, vendasit tregojnë më shumë rrezikshmëri, fillimisht me një goditje me kokë të Itakura-s (36’), pastaj me një tentativë të Hack (42’). Pjesa e parë mbyllet 0-0, por në pjesën e dytë, Augsburg fillon të shfrytëzojë epërsinë numerike. Në një periudhë të shkëlqyer 15-minutëshe, Claude-Maurice realizon një tregolësh (55’, 61’, 70’), me një super-goditje nga jashtë zone për golin e dytë. Pas golit të tretë, Mönchengladbach nuk arrin të reagojë dhe dorëzohet përfundimisht. Augsburg fiton 3-0 dhe ngjitet në 31 pikë, vetëm tre pikë pas Mönchengladbach, që mbetet në vendin e nëntë me 34 pikë.
WOLFSBURG - BOCHUM 1-1
Gjithçka ndodh në pjesën e dytë mes Wolfsburg dhe Bochum, me ndeshjen që përfundon në barazim 1-1. Vendasit nisin fort dhe krijojnë raste të mira me Koulierakis (8’) dhe Amoura (11’), por portieri Horn shpëton Bochum. Me kalimin e minutave, miqtë fitojnë besim dhe krijojnë disa mundësi të mira, sidomos me Masouras në kundërsulm dhe me një goditje me kokë të Bernardos në minutën e 42-të. Pjesa e parë mbyllet 0-0.
Në pjesën e dytë, Bochum kalon në avantazh në minutën e 49-të me Masovic, por Wolfsburg reagon menjëherë. Në minutën e 66-të, Amoura shënon për 1-1, por goli anulohet pas rishikimit në VAR. Barazimi i vërtetë vjen në minutën e 82-të, kur Svanberg (ish-lojtar i Bolognës) shënon golin e barazimit. Me këtë rezultat, Wolfsburg shkon në 34 pikë, ndërsa Bochum mbetet në zonën e rrezikut, me vetëm 17 pikë.
